Assam NRC chungchanga sorkar laipui ngenna Supreme Court-in a hnawl

Assam-a National Register of Citizenship (NRC) kalpui meka sorkar laipui leh Assam sorkarin list-a tel leh paihte ennawn a dilna chu Supreme Court-in a hnawlsak. 

Sorkar laipui hian SC-in August 31-a NRC deadline a siam chu sawn hlat leh an dil a, kaltlangpui a nih chuan mi nuai hnih vel zet chu dik lo taka telh leh paih an ni dawnin an hria a ni. Mahse he an ngenna hi SC chuan Thawhlehni khan a hnawlsak a ni.

Chief Justice Ranjan Gogoi leh Justice R F Nariman-te kaihhruai bench chuan Aadhaar data ang khan Assam NRC data neihna atan pawh hian dan mumal tak siam a ni tih sawiin, August 31-a list-a tel lote hming puanzar tura tih chu kaltlangpui a nih dawn thu an sawi.

SC chuan NRC kalpui mek ennawn lehna hun chu hawn theih a ni lo tih leh district office tinah tel leh tel lote list pawh hard copy-a tihchhuah tura pe turin a ti bawk. Court chuan Decem­ber 3, 2004 hnu lama piangte chu an nu leh pate doubtful voter emaw ramdang mi emaw an nih chuan NRC-ah telh an ni dawn lo tih a sawi bawk a ni.