Manipur-ah Citizenship Bill duh lohna lantir leh

Manipur hmun hrang hrangah Pathianni khan Citizenship Amendment Bill duh lohna lantir leh niin, zirlai pawl, hmeichhe pawl leh civil society pawl tam takin duh lohna hi an lantir a ni.

Keisampat Thokchom Leikai, Keisam­thong aṭanga Leirak, Singjamei Bazar, Imphal West district-a Kakwa Bazar, Bishnupur district-a Nambol, Kakching district-a Kakching Bazaar-ahte leh Thoubal district-a Yairipok Bazaar-ahte bill duh lohna hi lantir a ni.

Imphal-ah chuan hmeichhe pawl 

ṭhenkhat chuan Citizenship bill sût tura nawrin sumdawnna hmun lianahte sit-in protest an nei a,  Khwairamban Bazaar-a hmeichhe dawrkaite chuan bill thlawptu MP leh MLA-te chu bang tura an ngiat thu an sawi.

Manipur University Centenary Hall-ah zirlai pawl paruk- All Manipur Students’ Union (AMSU), Manipur Students’ Federation (MSF), Democratic Students’ Alliance of Manipur (DESAM), Kangleipak Students’ Association (KSA), Students’ Union of Kangleipak (SUK) leh Apunba Ireipakki Maheiroi Sinpanglup (AIMS)-te chuan joint meeting neiin bill dodalna kalpui dan tur an rel a, he hunah hian Civil Society Organisation ṭhenkhatte pawh an tel.

Bill dodaltute hian bill hi hnawl bakah Rajya Sabha member zawng zawngte chu dodal turin an ngen a, January 30 hmaa Manipur state Assembly special session neih ngiatin bill dodalna resolution siam turin sorkar an nawr bawk.