Congress in Himanta Biswa Sarma sawisel Himanta lakah BDYC in FIR thehlut
Assam-a eptu pawl Congress party chuan Assam Finance Minister Himanta Biswa Sarma chu na taka sawiselin Hindu leh Muslim ṭhenhranna tualchhung politics kalpuiah an puh.
Congress hruaitu leh Assam minister hlui ni bawk Pradyut Bordoloi chuan Biswa Sarma chu Assam Jinnah a nih thu sawiin, Pakistan hmuchhuaktu Muhammad Ali Jinnah-an Muslim leh Hindu nihna hmanga India ram a ṭhendarhna hnung kha a zui tih a sawi.
Pradyut Bordoloi chuan BJP chu vote hmuh duh vanga Citizenship Amendment Bill kalpuiah puhin, power minister hlui chuan BJP chu Assam ṭhendarh tum an nih thu leh Chief Minister Sarbananda Sonowal leh Himanta Sarma-te pawh chu Assam mipuite tana mi hnawksak an nih thu a sawi a, Assamese-te pawh nakin lawkah chuan an ram ngeiah hnam tlem zawk an la ni dawn tih a sawi bawk.
Minister hlui chuan Himanta Sarma leh Sarbanada Sonowal-te inkarah pawh a rukin indona a awm reng tih sawiin, Himanta chuan BJP chief Amit Shah leh PM Narendra Modi-te nena an inkar tiṭhaa Assam Chief Minister nih a tum tih a sawi a ni.
Hetihlai hian Barpeta District Youth Congress (BDYC)-te chuan Himanta Biswa Sarma lakah hian FIR an thehlut.
District Youth Congress-te hian Barpeta district-a Manida police outpost-ah FIR hi thehlutin BJP hruaitu hian January 16-a Guwahati-a talk show neihnaa a thusawiah ram dan kalh, thu dik lo leh dan phal loh thu sawiah an puh.
FIR-ah hian mi 21 in hming an ziak a, hming ziaktu zingah hian BDYC Anwarul Islam Khan pawh a tel.
Khan hian Baghbar LAC-a Bangladeshis Muslim foreigner-te chungchang a sawinaah Sarma hian thu dik lo a sawi niin a puh a ni.