Meghalaya lungalhthei khura: Ruang hmuh tunge a nih la hre lo SC hearing hma lungalhthei phurh phal

Kum liamta December 13 aṭanga tang tawh, Meghalaya East Jaintia Hills-a lungalhthei khura tang mi 15 zinga mi pakhat ruang chu kar liamta Nilaini khan Indian Navy tui lutthiamte chuan hmu tawh mah se, tuihnuai aṭanga video record aṭang ringawt chuan tunge a nih hriat theih a nih loh thu official-te chuan an sawi.

Navy tui lutthiamte hian remotely-operated vehicle (ROV) hmangin tuihnuai feet. 160-a thukah ruang hi an hmu a, ROV hmang hian ruang hi khur luhna thleng hnukchho mah se doctor-te chuan a tunge a nih hriattheih a nih hmaa a darh hlauh vangin tui aṭanga lakchhuah hi an la phal lo a ni.

Beihpui thlaknaa thu­puangtu pakhat R Susngi chuan khur chhunga tang zinga mi panga chhungte chu Zirtawpni khan an koh thu sawiin video an en hnu pawh hian tunge a nih an hriat theih loh thu a sawi. Chhungkaw dangte  pawh an koh mek thu a sawi bawk.

Meghalaya lungalh­thei khur chhunga tangte hi ni 39 zet chu an chin hriat a ni tawh lo a, kar hmasaa ruang an hmuh bak hi chu ruang dang hmuh a nih thu report a la awm lo a ni.

Hetihlai hian Megha­laya sorkar chuan Su­preme Court hearing neih hma chu state chhunga lungalhthei phurh phalna thupek Inrinni khan an tichhuak.

Commissioner and Secretary of Mining and Geology, Tining Dkhar chuan thupek tichhuakin Meghalaya state pawn aṭanga lakluh lungalhtheite chu phurhkhual phal a nih thu tarlan a ni. 

Dkhar chuan state pawn aṭanga lungalhthei phurh luh chu an phal hrih tih sawiin Supreme Court hearing neih hma chu phal a ni dawn tih a sawi. Court hian kar liamta Thawhlehni khan lungalhthei phurh hi khapin February 19-a ngaihtuah ṭhat leh a nih hma chu khapna thupek a tichhuak a, mahse hei hi Inrinni khan tihdanglam a ni leh ta a ni.