Modi rorelna hi India democracy fiahna hun a ni: Gegong Apang Party thar din tum

Kar liamta lawka Bharatiya Janata Party (BJP) chhuahsantu Arunachal Pradesh Chief Minister hlui Gegong Apang chuan Inrinni khan Narendra Moi rorelna chu India democracy fiahna hun a nih thu sawiin, ram ṭhendarh tumah a puh.

Gegong Apang chuan Delhi-a chengte chuan ram an ṭhendarh tih sawiin a bik takin hmarchhak chu an ṭhendarh tih a sawi. Citizenship Amendment Bill chu political party in ram a ṭhendarh theih dan entirna a nih thu a sawi bawk.

Arunachal CM dinhmun chelh rei ber tu leh Prime Minister eng emaw zat, Indira Gandhi aṭanga Manmohan Singh hunlai thlenga lo thawhpui tawhtu Apang chuan sorkar hmasa-te kha chuan federal democracy an kalpui tih sawiin tuna sorkar erawh chuan ram an ṭhendarh thung niin a sawi. 

Apang chuan Indira Gandhi, Rajiv Gandhi, P.V. Narsimha Rao, H.D. Deve Gowdaji leh Atal Bihari Vajpayee-te thlengin a thawhpui tawh tih sawiin, heng mite hi chuan federal democracy an kalpui thu a sawi a, mahse kumli kalta erawh kha chu India democracy tana fiahna hun a nih thu West Bengal Chief Minister Mamata Banerjee-in ‘United India Rally’ a buatsaiha thu a sawinaah a sawi a ni.

Arunachal Pradesh democracy pawhin hun harsa tak a paltlang mek tih sawiin sorkarna siam mek BJP chuan Chief Minister hlui Kalikho Pul inthah dan chungchang chhui tura CBI kohluh pawh an duh lo tih leh CBI ngei pawh BJP puppet an nih tawh thu a sawi. 

Gegong Apang hian Zirtawpni khan party thar a din tur thu leh party dang zawm a tum loh thu a sawi bawk.

Kum 69 mi Gegong Apang hian kar hmasa Thawhlehni khan BJP a chhuahsan a ni. Apang hian Arunachal CM dinhmun kum 22 lo chelh tawhin, 1980 aṭanga 1999 inkar leh 2003 aṭanga 2007 inkar khan Arunachal CM a ni ṭhin a ni.