Assam-ah Chhungkaw nuai khat hnenah ram pe dawn

Assam chief minister Sarbananda Sonowal chuan Ningani khan National Register of Citizens (NRC)-a tel khua leh tuite an nihna humhimna turin sorkar chuan ram nei lo chhungkaw nuai khat hnenah ram a pe dawn tih a sawi.

Khanapara Veterinary college playground-a 73rd Independence Day lawmnaa thu a sawinaah, Sarbananda Sonowal chuan state sorkarin Assam Accord Clause 6 kalpuina tur high level committee a din chu prime minister Narendra Modi hmalakna chhinchhiah tlak a ni tih a sawi bawk. Sorkar laipuiin Assam-a community paruk- Tai Ahom, Moran, Matak, Sutia, Koch Rajbongshi leh Tea Tribe-te Schedule Tribe status pek an nihna tura a hmalaknate a sawi lang bawk a ni.

NRC chungchang pawh sawilangin Sonowal chuan NRC update hna chu Supreme Court enpuina hnuaiah sorkar hnathawk mi 55,000 zetin an kalpui reng tih leh, NRC tihchhuah a nih hunah Assam chu pawn lam aṭanga chimbuaina lakah a fihlim tawh dawn thu a sawi.

Land rights tel lo chuan eng community mahin an nihna an humhim thei lo; hemi a nih avang hian ram nei lo chhungkaw nuai khat aia tam hnenah ram kan pe dawn a ni, a ti.