Kum 5000 liamta aṭang khan India hi Hindu ram a ni: Himanta Biswa Sarma
Hmarchhak hmun hrang hrangah Citizenship Amendment Bill dodalna nasa taka kalpui a nih mek laiin, Assam Finance Minister Himanta Biswa Sarma chuan inhnialna chawkchhuak tur tak mai thu a chhakchhuak leh ta!
Himanta Biswa Sarma chuan kum 5000 liamta aṭang khan India ram chu Hindu Rashtra (Hindu ram) a nih thu sawiin Constitution chu India hi secular a ni tur a ni tih sawina ṭawngkam mai a nih thu leh kum 5000-a upa history awm tawh chu hnualsuat theih a nih loh thu a sawi. Khang hunlai aṭang daih tawh khan Hinduism chu ramchhungah nasa taka kalpui a nih tawh thu leh Mughal ho India rama rawn lut khan Islam an rawn luhpui chauh thu a sawi a, Buddhist-te pawhin Buddhism an rawn pu lut leh mai niin a sawi.
Himanta chuan Assam chuan Citizenship Amendment Bill chu an pawm mai tur a ni, tiin a sawi leh bawk.
Assam Health Minister hi Citizenship Bill dodaltu mi ṭhenkhat chuan flag dum lo hmuhin bill duh lohna an lantir a, Barpeta Youth Congress-te pawhin kar liamta khan Sarma lakah hian FIR lo thehlut tawh bawkin, January 16-a Guwahati-a a thusawinaah thu dik lo, dan kalh leh Constitution pawm loh thu a sawi niin an puh a ni.
Bill dodaltu ten flag dum an lo hmuh hi chhangletin Sarma chuan mi pariatin flag dum nen dodalna an lantir a nih chuan a tuk lawkah Bharatiya Yuva Morcha chuan mi 800 zet nen an chhanglet dawn tih a sawi.
Sarma thusawi hian mipuiteah zawhna a chawkchhuak nasa hle nia tarlan niin, India Constitution, policy leh sakhaw zalenna chungchangah zawhna nasa tak a siam nia tarlan a ni.