Citizenship Bill dodal turin Manipur CM hlui Ibobi inpeih
Manipur chief minister hlui Okram Ibobi Singh chuan Thawhṭanni khan hmarchhak chief minister-te chuan Citizenship (Amendment) Bill, 2019 chu inthuruala an dodal a nih chuan, sorkar laipui chuan a la thutak ngei dawn niin a sawi.
Okram Ibobi Singh chuan Mizoram leh Meghalaya chief minister-ten bil an dodal laiin Manipur CM chuan sorkar laipui chu ram leilung fate humhimna tur bill telh turin a nawr thung tih sawiin, Lok Sabha-ah pawh mipuite duhdan hnawlin Bill an pawm tho laiin Manipur CM a ngenna chu sorkar laipui chuan a pawmsak angem tiin zawhna a siam a ni.
Manipur Congress hruaitu Ibobi Singh hian Thawhṭanni khan Governor Najma Heptulla hnenah memorandum thehlutin a hma thei ang bera Assembly special session ko turin a ngen a, he hunah hian PCC president T.N. Haokip, Congress Working Committee member Gaikhangam leh midang pawhin an ṭawiawm a ni. Governor chuuan ni 15 tal an nghah tur thu a lo hrilh bawk.
Ibobi Singh chuan Congress in a tir aṭanga Citizenship Bill chu an dodal thu sawiin, all party meeting-te leh special Assembly session-te pawh an ngiat thu a sawi a, chhanna mumal an hmuh loh avangin Governor chu an hmu ta niin a sawi. Bill dodalna chu a thlawp tlat tih sawiin sorkar laipui chuan Act East policy leh hmarchhak hmasawnna sawi fo mah se a taka tih a awm si lo nia sawiin hemi a nih avang tak hian bill pawh hi an manganpui hle tih a sawi a ni.