Kaziranga-a sava awm zat 175% in a pung

Assam-a Kaziranga National Park and Tiger Reserve-a sava awm zat chu nikum aiin 175% zetin a pung. 

Thawhlehni khan Prin­cipal Chief Con­servator of Forests (wildlife) Amit Sahai chuan 3rd Annual Water­fowl Census of Kaziranga result tarlangin, park chhunga sava awm zat nasa taka a pun chhoh thu a sawi. 

February 6 leh 7 khan census hi neih a ni a, park chhunga waterfowl leh thlasik sava pem chi awm zatte a theih angin chhiar a ni. Official thuchhuah chuan, ni hnih chhiarpui neih chhung hian bird species 112-te chhiar an ni thu a sawi a, species tam ber chu varak leh vatawk lam awmna, Anatidae family amite an nih thu a tarlang. Heng zinga a tam ber chu Eurasian Coot, Bar-headed Geese leh Common Teal-te an ni. 

Kaziranga-a waterfowl species 112 zingah 58 chu pem chi, khawvel ram hrang hrang, Europe, Central Asia leh East Asia aṭanga Kaziranga rawn pante an ni. Park chhunga wetland 52-ah chhiarpui ni neih a ni a, sava pun chakna ber chu Burhachapori Widlife Santuary-ah niin, nikuma sava awm zat 9,244 chu kuminah 71,902-ah an pung. 

Annual waterfowl census hmasa ber hi kum 2018 khan neih niin, sava 10,412 chhinchhiah an ni. Nikum chhiarpuiah khan 34,284 awmin, kuminah chuan 93,491 an awm tawh a ni. Kum 1908-a din, Kazi­ranga National Park hi kum 1985 khan UNESCO World Heritage site-ah puan a ni tawh. Park hi sq km 1,302-qa zau niin, khawvela vang tawh tak, samak ki khat nei chi awmkhawm tamna ber niin, 2,640 vel an awm mek nia chhut a ni.