AP-ah sorkar official-te toxicology test neih tir dawn

Arunachal Pradesh sorkar chuan sorkar official zingah ruihhlo hmang sual tam tak an awm nia report a awm avangin, ruihhlo hluar zualna district-a thawk sorkar official-te chu toxicology test neih tir a tum. 

Chief secretary Naresh Kumar chuan ruihhlo kaihhnawih thila inhnamhnawih nia rinhlelh official-te chu ruihhlo laka an fihlim leh fihlim loh enfiahna turin test hi neihtir an ni dawn tih sawiin, a fihlim lo te lakah na taka action lak a nih tur thu a sawi. 

State Level Technical Expert Committee (SLTEC) meeting, Thawhṭannia neihah Chief Secretary chuan hemi chungchang hi sawichhuakin, India rama ruihhlo hluarna district 272 zingah an state-a Namsai, Lohit, Dibang Valley, Upper Siang, Anjaw, Changlang, Tirap leh West Kameng district-te chu an tel tih a sawi bawk. 

Ruihhlo tihrem tuma hmalaknaah opium leh ruihhlo dang chinna hmun tihchhiat ringawt chu a tawk lo tih sawiin, Kumar chuan secondary leh senior secondary school zirlaite chu ruihhlo hmansual ṭhat loh ziate chiang taka zirtir fo an ngai a, hei bakah hian ruihhlo dona kawngah pawh hmeichhiate leh panchayat member-te an inrawlh ve a ṭul a ni, a ti.