Citizenship Bill duh lohna kawngzawh Guwahati-ah nei

Nilaini-a Aizawl-a MZP buatsaiha Citizen­ship Amendment Bill duh lohna kawngzawh liantham tak buatsaih a nih mek lai khan Assam state khawpui Guwahati-ah pawh All Assam students’ Union (AASU)-te huaihawtin bill duh lohna lantirnan mi sang tam tak an pungkhawm.

Guwahati-a bill duh lohna lantirna atana punkhawmna hi ‘Bajra­ninad’ (voice of thunder) tih niin, pawl 30 chuangin an thlawp bakah political party leh mi hrang hrangin an thlawp.

AASU adviser Dr Samujjal Bhattacharya chuan Assam Accord-a a inziah angin 1971 thleng dan loa lo lutte vanga buaina chu an pawm thu sawiin, Parliament-a thlen a nih pawh khan khatih hunlaia BJP hruaitu Atal Behari Vajpayee leh L.K. Advani-te pawh khan an thlawp tih a sawi. Mahse tuna sorkar chuan 1971 hnu lama rawn lutte pawh khua leh tui pek an tum tih sawiin, chu chu an pawm thei lo tih a sawi a ni.

Dr Samujjal Bhattacharya chuan sorkar laipui leh Assam-a BJP sorkar chu dan loa ram chhunga lo lut Bangladesh mite humtu an nih thu sawiin, inthlan hmain ram leilung fate venhim chungchang sawi mah se inthlana hnehna an chan hnuah erawh dan loa lo lut Bangladesh miteah chiah rilru an pe niin a sawi.

‘Raij Mel (community meeting)’ leh Gaon Sabha pawh an buatsaih nghal dawn thu sawiin state chhung hmun  hrang hrangah nasa taka hma an lak dawn thu a sawi bawk.

Bangladesh Hindu-ten Tripura demography an tih dang­lam nasat zia sawilangin, state chhunga mipui awm nuai 40 zinga nuai 12 chiah chu ram leilung fate an nih tawh thu a sawi. Hetiang thil hi Assam-ah chuan thlentir an phal dawn lo tih a sawi a ni.

Nilaini-a AASU bultuma punkhawmnaah hian North East Students’ Organisation (NESO) leh Meghalaya-a Khasi Students’ Union (KSU) member-te pawh an tel.