Assam: Court in 2008 bomb puak thubuai hearing nei zo

Kum 2008,October 30-a Assam-a bomb puak thubuai hearing neih chu Thawhlehni khan zawh a ni a, hearing neih nan hian fast-track court buatsaih a ni.

Ranjan Daimary kaihhruai nia puh National Democratic Front of Boroland (NDFB) helte chuan October 30, 2008 khan Guwahati, Kokrajhar, Bongaigaon leh Barpeta-ahte bomb an tipuak a, mi 91 in nunna an chan phah bakah mi 400 zetin hliam an tuar bawk.

He thubuai hi kum 2011 aṭang khan tihkhawtlai a la ni reng a, 2017 khan state sorkar chuan hemi chungchang ngaihtuah tur special court din tura Gauhati High Court rawtna chu an pawm tawh a ni. He thubuaiah hian bomb puak tuartute leh inhnamhnawiha puhte hian thudik hailan thuai a nih theihna turin fast-track court buatsaih an ngiat ve ve a ni.

Advocate Manas Sarania, Daimary counsel chuan Thawhlehni khan hearing neih hi an zawhfel tawh thu sawiin, lehlam ve ve aṭangin thubuai hi an ngaithla tawh tih a sawi a, January 28 hian thubuai hi ngaihtuah ṭhat leh turin thutlukna an siam tih a sawi.

Court hian hriatpuitu 650 zet thusawi ziaklutin document leh finfiahna pawimawh 687 zet an zirchiang bawk.

Thuhretu 70 thusawi record nan hian kum kua zet hman niin, a dang zawng hi chu tunhnai thla tlemtea reocrd te an nih thu mi ṭhenkhat chuan an sawi.

Police-te chuan thuhretu ṭhenkhat phei chu an thi hman tih an sawi a ni. 

He thubuai hi CBI kuta dah a nih hnu khan mi 22 chu rinhlelh an ni a, heng zinga 15 hi chu jail-ah dah an ni tawh.