CAB dodalna turin Manipur zirlai ṭhenkhat Republic Day-ah tel dawn lo

Citizenship Amendment Bill duh lohna lantirna atan Manipur-a zirlai eng emaw zat chuan Republic Day lawmnaah an tel dawn loh thu an sawi.

Manipur College Stu­dents Union General Sec­retary, Laishram Sachindev chuan Thawhlehni khan Lok Sabha in tunhnaia an pawm, Citizenship Amendment Bill duh lohna lantir nan an college zirlaite chu Republic Day-ah an tel dawn lo tih a sawi a ni.

DM College of Art zirlaite pawhin state sorkar bakah MP Bhabananda-te chu Rajya Sabha-a bill hnawl a nih theihna tura sorkar laipui nawr turin an ngen ve bawk. 

DM College of Arts, general secretary, arts stu­dent union, Ningthoujam Priyobrata chuan January 8-a Lok Sabha in an pawm CAB chu khua leh tuite dikna chanvo kalh a nih thu sawiin, hmarchhak state-te tan leh ram leilung fate tana thil hlauhawm tak a nih thu a sawi. An pawl chuan bill dodalna chu an thlawp zel dawn tih sawiin, Republic Day lawmnaah pawh tel lo turin thutlukna an siam tih a sawi.

Kongjeng Leikai Meira Paibi general secretary, Nancy Wahengbam pawhin zirlaite hmalakna hi an thlawp tih an sawi ve bawk.