Meghalaya lungalhthei khur: Ruang pakhat la chhuak

Meghalaya East Jaintia Hills-a Ksan thingtlang khuaa lungalhthei khura tang mi 15-te chu kar ruk zet an tan hnuah Ningani khan ruang pakhat chu lakchhuah a ni ta.

Kar liamta Nilaini khan Indian Navy tui lutthiamte chuan ruang hi an hmu tawh a, Remotely Operated Vehicle (ROV) hmangin feet 160 zeta thuk­ah ruang hi hmuh ni tawhin an lakchhuah dawn hian  a ruang hi a darh hret hret zel avangin an lachhuak ngam lo reng a ni.

Mahse Ninagni khan a ruang hi lakchhuah a ni ta a, a ṭawih chhe tawh hle niin an sawi.

National Disaster Response Force official Santosh Kumar Singh chuan ruang chu lak­chhuah a nih tawh thu leh a ṭawih nasat tawh thu a sawi a, report a tarlan a nih dan chuan feet 100-a thuk aṭangin ruang hi an lachhuak a ni. 

Ruang hi lachhuak ngam lawk lo mah se Ninagni khan district thuneitute thurawn angin an lachhuak ta niin an sawi.

Nimin kha chhanchhuah hnathawh ni 44-na chiah a ni tawh a, Nilaini khan darkar 24 chhungin Coal India Ltd, Odhisa Fire Service leh Kirloskar Brothers Ltd-te chuan tui litre nuai 81 zet an pump chhuah thu tarlan a ni bawk.

State sorkar chuan khur chhunga tang chhungte hnenah hian zangna dawmna cheng nuai khat pek a nih tur thu an lo sawi tawh a, Supreme Court pawhin kartin hnathawh dan hi an vil reng a ni. 

Thawhṭanni hian lungalhthei khur chungchanga hearing hi neih a ni leh ang.