Citizenship bill chungchang ngaihtuah turin Manipur CM in political party-te a ko

Manipur Chief Minister N Biren Singh chuan Citizenship Amendment Bill chungchang ngaihtuah turin political party zawng zawng meeting January 29-a neih turin a ko.

Chief minister media advisor, Irengbam Arun chuan Ningani khan hemi chungchang hi sawiin, Chief Minister chuan January 29 hian bill chungchang sawiho turin political party zawng zawng meeting chu a chenna inah a ko a ni, a ti.

Tunah hian Manipur-ah hian BJP kaihhruaina hnuaiah sor­karna siam mek niin, National Peo­ple’s Party, Naga People’s Front leh Lok Janshakti Party-te an thawh­pui a ni.

Hetihlai hian Manipur-ah hian Citizenship Bill do­dalna hi a la nasa hle a, state chhung hmun hrang hrangah bill duh lohna hi lantir mek zel a ni. Manipur People’s Party (MPP), zirlai pawl te leh civil society-te chuan nasa takin dodalna an kalpui mek.

MPP president O Jugindro chuan an party chuan an theihna zawng zawngin bill chu an dodal zel dawn tih sawiin Rajya Sabha-a bill pawm a nih chuan hmarchhak mipui, ram neitute tan chuan thil hlauhawm tak a nih tur thu a sawi.

Zirlai pawl paruk leh hmeichhe pawl ‘Meira Paibi’-te chuan Rajya Sabha-a CAB phah a nih hunah New Delhi-ah duh lohna an lantir dawn thu an sawi bawk.

Hetiang a nih mek lai hian state cabinet chuan sorkar laipui hnenah Manipur Peoples’ (Protec­tion) Bill, 2018 pawmpui turin an nawr ve mek bawk a, he bill hi pawm a nih chuan ram neitute chu chu an him thei dawn niin an sawi.