Meghalaya lungalhthei khur: Navy-ten ruang dang hmu leh

Meghalaya East Jaintia Hills-a lungalhthei khura tang zinga ruang pakhat chu lakchhuah a nih hnuah, Inrinni khan Indian Navy tuilut thiamte chuan ruang dang an hmuh belh leh.

Indian Navy-te chuan Inrinni zing dar 3.18 khan ruang hi hmuh a nih thu an sawi a, underwater remotely operated vehicle (UROV) hmanga hmuh a nih thu a sawi. Ruang an zawn lai hian thing tawlailir an sut thu sawiin hemi hnu lawkah hian ruang hi an hmu zui tih an sawi a ni.

Navy-te chuan ruang lachhuak tur hian theihtawp an chhuah tih sawiin, a rang thei ang bera lakchhuah theih an beisei thu an sawi bawk. 

Kar liamta Nilaini-a ruang an lakchhuah tak kha Zirtawpni liamta khan tunge a nih hriat a nih tawh thu tarlan a ni a, western Assam Chirang district mi Amir Hussain a nih thu an sawi. Ruang hi a chhungten an enfiah hnuah Amir Hussain ngei hi a ni tih an tichiang ta a ni.

Police-te chuan Inrinni zing khan a chhungte kutah hian ruang hi an hlan tawh bawk.

Meghalaya lungalhthei khura tangte mi 15-te hi nikum De­cember 13 aṭang khan an tang tawh a, an tan aṭanga ni 32 zet a liam hnuah ruang pakhat an hmu thei chauh a ni.