Kashmir hnungzui lo tura Assam siam thei tur chu Citizenship Bill chiah a ni: BJP

Assam BJP chuan thuchhuah siamin Kashmir hnugzui lo tuar Assam siam thei awmchhun chu  Citizenship (Amendment) Bill 2016 chiah a nih thu an sawi.

BJP chuan Bill kalpui chunga Assam Accord’s Clause VI leh community paruk hnena ST status pek chu Assam chhanhimna awmchhun a nih thu an sawi a ni.

Kar hmasa Ningani-a Guwahati-a BJP-ten kawng an zawhnaah, state Finance Minister Himanta Biswa Sarma chuan Assam chu ‘Jammu and Kashmir’ thara siam a phal lo tih a sawi.  1971 khan Assam-a mipui cheng 71% chu Hindu an nih thu sawiin, 2011-ah kha chuan 61% chiah an ni tawh tih a sawi. 2021-a Bangladesh mi Hindu Bengali nuai riat Assam aṭanga lakchhuah an nih chuan, Assam-a Hindu awm zat chu 51 emaw 52% velah a tlahniam tawh dawn tih sawiin, hetiang a nih chuan Badruddin Ajmal emaw Sirajudin Ajmal emaw-te state chief minister an ni mai dawn niin a sawi bawk.

Sarma chuan Hindu Bangla­deshi-te dodaltute chuan Assam-a district 14-a thuneihna an hloh dawn tih an hre lo tih sawiin, seat 30 zet chu a bo tawh thu a sawi. Bill pawm a nih chuan assembly seat 17 tal chu an chhanhim thei dawn a ni, a ti.

1985-a din United Minorities Front (UMF)-te pawhin a hma chuan Bangladesh aṭanga lo kal Hindu-te chu khua leh tui pek an duh tih sawiin, a hnuah an dinna an thlak leh tih a sawi bawk.

Biswa Sarma chuan All Assam Minority Students Union (AAMSU) member-te chuan so­cial media lamah Bill dodal turin thu an thawndarh nasa a, mahse heng mite ngei pawh hi Assam-a econo­mic refugee an ni tih a sawi a, a mobile-ah pawh vauna message a dawng niin a sawi.