Citizenship Bill pawm a nih chuan India aṭanga inlakhran duh BJP leh AASU inkarah buaina chhuak

Assam-a Krishak Mukti Sangram Samiti Leader Akhil Gogoi chuan Pathianni khan Assam mipuite zahna lantir a nih loh a, Citizenship Amendment Bill pawm a nih chuan sorkar hnenah India aṭanga inlak hranna thu hrilh tura huaisenna an neih a ṭul thu a sawi.

Pathianni khan Assam Tinsukia district-a  Pani­tola-a bill duh lohna kawng­zawhnaa thu a sawinaah Akhil Gogoi chuan sorkarin an phu ang tawk zahna a lantir a nih phawt chuan ram inpumkhatna chu an pawm reng tih a sawi a, mahse Assam ram leilung fate duhdan chu hnawl a nih a, bill pawm a nih chuan, Assamese mimal tin chuan India aṭanga inlahrang turin huaisenna kan nei tur  a ni, a ti.

Gogoi hian Pathianni khan pawl 70 inthurual ten bill dodalna kawngzawh an neih chu a kaihruai a, a ṭulna in a nang a nih phawt chuan Assam chu India-a tel ve reng lo tura thu an tihtluk ngam a ngai tih leh an dinna an tihchian a ṭul tih a sawi. "Sorkarin min zah chuan India-ah kan awm reng ang a, a nih loh chuan kan chhuak ang," tiin a sawi a ni.

Akhil Gogoi, Sahitya Aka­demi winning litterateur Hiren Gohain leh  journalist Manjit Mahanta-te lakah hian police-te chuan a hma in Guwahati-a inlakhranna lam thu an sawi vangin sedition case an ziaklut tawh hial a ni.

Hetihlai hian BJP worker-te leh All Assam Students' Union (AASU) activist-te chu Nalbari district-ah an innek buai nia tarlan a ni bawk.

Health Minister Himanta Biswa Sarma leh Industry Mi­nister Chandra Mohan Patowary-te chu Chief Minister Sarbanada Sonowal-an damdawi-in a hawnna lam pana an kal BJP-ten bike rally hmanga an escort-naah zirlai pawlte hian bill duh lohna hi an lo lantir a, hetah hian an innek buai niin an tarlang.

AASU-te hian flag dum kengin bill hnuhdawh hi an ngiat a, hei hi BJP worker-te hian lunga lo vawmin an lo dang niin an sawi a, buaina liantham a chhuah hma in police-te chuan boruak an bengdai hman a ni. He thil thlengah hian BJP activist-te chuan Ghograpar police station-ah thubuai an ziaklut bawk.

Citizenship Amendment Bill, 2016 hi January 8 khan Lok Sabha chuan a pawm tawh a, Rajya Sabha-ah erawh ngaihtuah a la ni lo thung. Bill hi pawm a nih a, Act-a chantir a nih chuan Bangladesh, Pakistan leh Afghanistan aṭanga India ram rawn lut, muslim ni lote chu kum nga an awm tlin chuan India khua leh tui an ni thei dawn a ni.

Hei hi hmarchhak hmun hrang hrangah chuan dodalna a nasa hle a, ram leilung fate chuan inchimralna hmanruaah ngaiin nasa takin an dodal a, BJP vote zawnna mai niin an puh bawk.