CAB vangin Manipur-a party hrang hrangin meeting an nei

Manipur Chief Minister N. Biren chuan Citizenship Amendment Bill chungchang ngaih­tuah turin nimin khan all-party meeting a ko.

He thuziah lai hian report kimchang hriat la ni lo mah se party ṭhenkhat erawh chuan tel an tum loh thu an sawi thung.

Janata Dal (United) chuan an tel dawn loh thu sawiin, JD (U) state president Hankhanpao chuan Chief Minister chuan emergency session a ko duh lo tih a sawi.  Manipur People’s Party pawhin meeting-ah hian an tel dawn lo tih sawi bawkin, vantlang hmaah an dinna an sawichiang tawh a, sawibelh tur a awm tawh lo tih an sawi.

MPP chuan BJP sor­kar chu emergency session ko tur an nih laiin an ko lo tih an sawi a, all party meeting-ah pawh chuan tel an tum loh thu leh CM chuan mipuite rilru mumal nei thei loin a siam tih an sawi a ni.

Hetiang a nih mek lai hian Manipur-ah hian CAB dodalna hi a la nasa hle a, pawl tam takin duh lohna an la lantir chhunzawm zel a ni.

Pathianni pawh khan Imphal East district-a Khetriga-ah chuan Prime Minister Narendra Modi lim hal a ni leh. North East India Development Party kaihhruaina hnuaiah bill duh lohna signature campaign hi kalpui  a ni a, bill hi paihthlak a nih hma chuan campaign chu an kalpui zel dawn tih an sawi.

Chief Minister N. Biren chuan union home minister berin hmarchhak leilung fate duhdan chu humhim a nih dawn thu a sawi tawh avangin do­dalna lantirna chu chawlh­san a hun tawh niin a sawi thung a ni.