Nagaland-ah Citizenship Bill a hman theih loh: Governor

Nagaland Governor PB Acharya chuan Inrinni khan Citizenship (Amendment) Bill chu Nagaland-ah hman theih a nih ve loh thu a sawi.

Republic Day thuchah a sawinaah Governor chuan tunhnai lawka Lok Sabha in a pawm Citizen­ship (Amendment) Bill chungchang chu an ngai­pawimawh tih sawiin, an ngaihdan chuan CAB chu Nagaland-ah a hman ve theih lo tih a sawi. Nagaland chu India Constitution Article 371 (A) in a venhim thu sawiin, Bengal Frontier Regulation, 1873 hnuaia Inner Line Permit hmangin leh  16 Point Agreement-a Clause 16 hmangin venhim a ni tih a sawi.

PB Acharya chuan sor­kar laipui chu ram leilung fate dikna chanvo humhim turin a ngen nghal bawk.

Acharya chuan India sorkar chu hmarchhak state-te rawn chiang leh tura an ngen thu sawiin ram leilung fate dikna chanvo chu humhim vek tura an ngen thu a sawi. Nagaland Legislative Assembly hnuaia Standing Committee on Article 371 (A)-te chuan Citizenship (Amendment) Bill, 2016 chungchang chu uluk zawka zirchiang turin an ngen tih a sawi a ni.

Article 371 (A) pawi­mawhna pawh sawichhuakin governor chuan special provision a nih thu a sawi a, Naga-te history leh culture danglam tak bakah an hnam tihdna phungte humhimna tur a nih thu a sawi. He Article hian Nagaland mipuite dikna chanvo humhim mai bakah mipuite hmasawnna tur a keng tel tih a sawi.