EGH residential school sakah hmasawnna muang NGO-te mangang

 Meghalaya East Garo Hills-a Rongjeng Achik Students’ Welfare Association (ASWA)-te chuan kum nga kal tawh aṭanga sak ṭan Rongjeng Block-a Naringre thingtlang khuaa residential school sakah hmasawnna a muang lutuk chu an mangan thu an sawi.

ASWA president Mukesh Marak chuan kum eng emaw zat liamtaah khan sorkar chuan state chhung hmun hrang hrangah residential school sak tur an tarlan zingah  Dambo-Rongjeng Block-a  Naringre pawh chu a tel ve thu sawiin, school sak pawh chu an ṭan ngei tih a sawi. Mahse school sak hna chu a muang hle nia sawiin kum nga a liam hnu pawhin luah theih a la ni lo tih an sawi a ni.

Hemi a nih avang hian NGO chuan thil awmdan chu chhuichian an phut tih sawiin, engvanga school sak hna chu muang em em nge a nih tih an hriat duh thu an sawi. An ni chuan he thil hi an ngai thutak hle tih sawiin, sorkar bakah a department kaihhnawihte chu hma la ngei tura an ngiat thu an sawi bawk.