Hmarchhaka BJP thawhpuiten meeting nei CAB duh lohna resolution siam

Sorkar laipuia sorkarna siam mek Bharatiya Janata Party (BJP) in hmarchhaka a thawhpui party-te chuan nimin khan Citizenship Amendment Bill chungchangah meeting an nei a, Meghalaya Chief Minister Conrad Sangma chuan meeting hi a kaihruai.

Meeting hi Meghalaya-a sorkarna siam mek, BJP thawh­pui Nationalist People’s Party (NPP)-te koh niin, BJP ni lo hmarchhaka party liante chu meeting tel tur hian an sawm. 

Anti-CAB meeting-ah hian hmarchhaka regional party 11 telin, NEDA-a BJP thawhpui  Asom Gana Parishad (AGP), National People's Party (NPP), Nationalist Democratic Progressive Party (NDPP), United Democratic Party (UDP),  Peoples Democratic Party (PDP), People's Democratic Front (PDF),  Hill State People's Democratic Party (HSPDP), Mizo National Front (MNF), Sikkim Democratic Front (SDF), Naga People's Front (NPF) leh Indigenous Peoples Front of Tripura (IPFT)-te bakah Bihar-a NDA member Janata Dal (United) (JD(U) pawh an tel.

AGP President Atul Bora chuan a tawp thlengin Citizenship Amendment Bill an do dawn tih a sawi. Media miten an kawmnaah Bora chuan anti-CAB regional party-te chuan committee pawh an din maithei tih sawiin, committee hnuaiah hian Bill dodalna kawngah hian regional party-te thawhpuina a tam thei ang ber neih an tum dawn tih a sawi. Hmarchhaka ram leilung fate chu inpumkhata, lungrual taka Bill dodalna kawnga ke pen turin a sawm bawk. 

Anti-CAB meeting chuan President Ram Nath Kovind leh Prime Minister Narendra Modi-te a rang thei ang bera hmuh an rel a, Rajya Sabha-a Bill lo dang tura BJP nawr an rel bawk a ni.

Meghalaya Chief Minister leh NPP president ni bawk Conrad K Sangma chu a huaihawttu ber niin, AGP chu co-convenor an ni thung. 

JD(U) aiawh hian general secretary KC Tyagi pawh telin, Nagaland CM hlui TR Zeliang pawh meeting a tel langsar zingah a tel.

Conrad Sangma chuan an meeting chu organize meeting a nih loh thu sawiin party hrang hrang kalkhawmte chuan Bill chungchang chu uluk taka ngaihtuah a ṭul nia an hriat avangin an kalkhawm tih a sawi. Hmarchhaka political party hrang hang kalkhawmte chuan inlungrual takin Bill dodal tur chu an pawm tih sawiin, President leh PM pawh an hmu thuai dawn tih a sawi. Ramchhunga party dangte pawh biakpawh an tum dawn tih a sawi bawk. 

Nimina meeting-ah hian Cong­ress leh Trinamool Cong­ress-te chu an tel ve lo a, Sangma chuan anni pawh hi biak an ni dawn tih a sawi a ni.