Manipur: Political party aiawhten sorkar laipui hotute hmu dawn

Manipur-a political party hrang hrangte chuan Thawhṭanni khan CM Secre­tariat-ah meeting an nei a,  Citizenship Amend­ment Bill chung­changah sorkar laipuia hotute hmuh an tum.

Political party aiawhte hian vawiin hian Imphal aṭangin Delhi an pan ang. Delhi pan tur zingah hian political party paruk aiawh an tel dawn niin an tarlang.

RMSA office-a press meet neihnaah Manipur sorkar thupuangtu leh Education minister ni bawk Th. Radheshyam chuan political party hrang hrang meeting neih chu a hlawkthlak hle tih sawiin, AITC, Shiv Sena, APP, LJP, NEIDP leh MNDF aiawhte chuan Manipur-a Citizenship Amendment Bill  hman a nih loh dan tur an ngaihtuah dawn tih a sawi.

Heng party aiawhte hian Manipur ram neitute hum­himna tur clause telh a nih theihna turin sorkar laipui an nawr dawn a, hemi chungchang sorkar lai­puia hotute hnena thlen tur ngaihtuah tur drafting commi­tte pawh an din nghal bawk. 

Th. Radheshyam chuan political party meeting-a Congress an tel lo chu pawi a tih thu sawiin, hetiang thil pawimawh ngaihtuahnaah hi chuan eptu pawl lian ber chu tel ngei tur a nih thu a sawi. Mipuite bumna politics khelh chu bansan a hun tawh tih sawiin, BJP chuan Manipur mipuite ṭhatna tur chu an duh ber a nih thu leh pawn lam mi Manipur-a an luh chu an phal loh tur thu a sawi.

Eptu pawl lian ber chuan state sorkar paihthlak chu an tum ber a nih thu sawiin, tuna thil thlengah chauh ni lo, Manipur University buaina chungchangah pawh khan a ni tawh niin a sawi. Congress chuan Lok Sabha-ah MP nei mah se an MP pakhat mahin CAB dodal zawngin thu an sawi ngai lo tih a sawi bawk.

Congress MP-te chu Rajya Sabha aṭangin an chhuak tau leh dawn em tia zawhna zawtin, Congress hruaitu, AICC chief, Rahul Gandhi pawh telin Bill chungchang ngaihtuah a nih tak tak lai khan an ngawi tlat niin a puh.