Tripura: Journalist ru bo, nasa takin kut thlak

Tripura-ah Journalist chunga tharum thawhna a thleng leh  a, tunhnai kum eng emaw zat chhung chu Tripura-ah hian Journalist-te an him lo hle niin a lang.

Pathianni khan Sepahijala district-a Sonamura-ah chuan Journalist pakhat chu ruihhlo hmanga sumdawng ṭhin nia hriatten an ru bo a, nasa taka kut thlakin, kawngsirah an hnutchhiah a ni.

Sepahijala District Superintendent of Police Sudipta Das chuan hemi chungchang hi Thawhṭanni khan complaint a luh thu sawiin, Sonamura police station-ah thubuai ziahluh a ni tih a sawi. Sudipta Das chuan pawikhawihtu hi an la hriat loh thu sawiin an chhuizui mek tih a sawi a, Journalist beih tawk hi Sadek Miah a nih thu a sawi.

Sadek Miah hian kut thlaktute hian uniform an hak thu leh paramilitary force-te pawh an ang hle niin a sawi a, tunah hian enkawl mek a ni.

Tripura Working Journalist Asso­ciation (TWJA)-te chuan thuchhuah siam nghalin, Tripura Police Sub-Divisional Police Officer (SDPO), Assam Rifles te leh Border Security Force (BSF) te chu he thilthlengah hian an inhmahnawih ve nia puh an nih thu an sawi. International drug smuggler-te pawh an tel nia rinhlelh an nih thu pawh an tarlang tel a ni.