Manipur R-Day bomb puak: PREPAK-ten an tih a nih thu sawi

Manipur-a hel pawl, Proscribed People’s Revolutionary Party of Kangleipak (PREPAK) -te chuan Republic Day-a bomb puak kha an tih a nih thu an sawi.

PREPAK-te chuan Improvised Explosive Device (IED) an tipuak niin an sawi a ni.

Inrinni liamta chawhnu lamah khan Imphal West district-a Border Roads Task Force (BRTF) Camp bulah IED bomb a puak a, thi leh hliam erawh an awm lo.

Hel pawlte hian Zirtawp­ni zanah pawh khan state chhung hmu li-ah IED bomb an tipuak tih sawiin, Inrinni-a bomb puak pawh hi an tih a nih thu an sawi.

IED tihpuah chu India in Republic Day vawi 70-na a lawm boycott-na peng pakhat a nih thu sawiin, Western South East Asia (WESEA) region-a fraternal revolutionary group-ten Republic Day an boycott-na peng a ni tih an sawi bawk.

Bomb puak chu India tana hriattirna chiang tak, WESEA mipui-ten Republic Day an dodal tih lantirna a nih thu an sawi.