Supreme Court-in Akhil Gogoi bail dilna a hnawl

Krishak Mukti Sangr­am Samiti (KMSS) hotu leh Raijor Dal party president Akhil Gogoi bail dilna chu nimin khan Supreme Court chuan a hnawlsak. 

Supreme Court-in Gogoi bail dilna a ngaihtuah ṭum khatna a ni a, judge pathum - justice NV Ramana, Surya Kant leh Aniruddha Bose awmna bench chuan a dilna hi a hnawlsak a ni. 

Citizenship Amend­ment Act (CAA) duh lohna lantira nawrh huaihawt ṭuma Jorhat-a buaina chhuak kaihhnawihah Akhil Gogoi hi kum 2019, December 12 khan police-ten an man a, Anti-CAA movement-a a tel avangin National Investigation Agency (NIA) chuan thubuai rip tak tak a siamsak zui a ni. December, 2019 aṭang khan Guwahati Central jail-ah a la tang chhunzawm reng a ni. 

January 7 khan Gauhati High Court chuan Gogoi-a bail dilna hi a lo hnawlsak tawh a, hemi hnu hian Supreme Court lamah Gogoi hi a kal lehin, Mahse Supreme Court pawhin a dilna hi a lo hnawlsak ve leh ta a ni. Nimina Gogoi bail dilna ngaihtuahnaa a aiawha inlan, senior advocate Jaideep Gupta chuan CAA dodalna hi ram chhung hmun hrang hrangah lantir a ni tih a sawi a, he dan duh lohna lantirna chuan firfiaka chetna nen inkaihhnawihna a nei lo tih a sawi. Nawrh huaihawtna hmun ṭhen­khatah chuan buaina chhuakte pawh a awm a, mahse hengah hian Gogoi chu mawhphurtu a ni tih finfiahna engmah a awm loh thu a sawi.  

Raijor Dal party hi KMSS political party din thar a ni a, jail-a a awm chungin Akhil Gogoi chu party president atan ruat a ni a, kumina Assam assembly inthlan lo awm turah pawh he party hming hian chuh an tum tih an sawi.