AP CM-in project-te enfiah dawn

Arunachal Pradesh chief minister Pema Khandu chuan an state chhunga project hrang hrang thawh mekte amah ngeiin a enfiah ṭhin dawn. 

Nilaini khan CM kaih­hruaiin tun thla atana monitoring meeting hmasa ber, 'Arunachal e-Pragati' tih chu virtual mode hmangin neih a ni a, deputy commissioner leh field officer-te an tel a ni. 

Meeting-a hian deputy commissioner leh field officer-te chuan project hrang hranga hnathawh leh hmasawn dante an sawi. CM chuan thla tina progress report pe ṭhin tur leh, hnathawhte chu a hmunah ngei enfiah ṭhin turin a hrilh. 

CM chuan Arunachal e-Pragat chu review meeting ni loin, moni­toring meeting a nih thu a sawi a, officer hrang hrangte chu project thawh mek chungchanga zawhna awmte pawh chhang thei zel tura inpeih turin a ti a ni. Hemi rual hian hna ṭha zawka thawh theihna tura rawtna an neihte pawh hrilh zel turin a chah bawk. 

Project thawh te a hun taka zawh a nih theihna tur leh, mipuite tana ṭangkai zawka hman a nih theihna turin deputy commissioner-ten mawh­phurhna sang tak an nei tih CM chuan a sawi a, hei vang hian sorkar project leh scheme hrang hrangah pawh neitu nihna thinlung pu chunga ṭha taka enfiah hna thawk zel turin a ngen.