Manipur-in contract-in healthworker chhawr chhunzawm thei tawh lo
Manipur chief minister N Biren Singh chuan Covid-19 hri leng dona kawnga thawktu indaih loh avanga contract-a chhawr, healthworker-te chu sorkarin a chhawr chhunzawm thei tawn dawn lo tih a sawi. Hemi rual hian health department hnuaia hna ruak dangah a remchan dan anga dah tum an ni tih a sawi bawk.
Assembly session neih mekah Nilaini khan CM chuan zawhna hi chhangin, Covid Care Centre, quarantine leh testing centre-ah thawktu indaih loh avangin contract-in healthworker 659 chhawr belh an ni tih a sawi a, heng zinga 86 chu medical officer niin, staff nurse 309 leh multi-tasking staff 264 an ni. A tirah thla thum atan rawih a ni a, a hnuah thla thum dang pawhsei leh a ni.
Sorkar chuan Covid-19 hri leng dona kawnga thawktute inpekna leh an hnathawh ropui tak takte a hriatpui a, mahse sorkar sum dinhmun ngaihtuahin contract-a thawktu lakte hi a chhawr chhunzawm theih tawh lo a ni, tiin CM chuan a sawi. Hetih lai hian Covid-19 contractual healthworker-te hian an service pawhsei sak tura ngenin nawrh an huaihawt mek a ni.