2008 Assam bomb puak: NDFB chief Daimary leh midang pakua damchhung lungin tang dawn

Guwahati Special CBI court chuan National Democratic Front of Bodoland (NDFB) founder leh hotupa ber  Ranjan Daimary leh midang pakuate chu kum 2008-a Assam bomb puak thubuaiah thiam loh chantirin, damchhung lungin tang turin a ti.

Thawhṭanni khan Special CBI court chuan Daimary leh midang 13-te chu thiam loh a chantir a, court hian kum 10 chuang liam hnuah bomb puak thubuaia thiam loh changte hremna tur thupek hi a tichhuak chauh a ni.

October 30, 2008 khan Assam hmun hrang hrang- Guwahati, Kok­rajhar, Bongaigaon leh Barpeta-ahte bomb na tak a puak a, mi 88 in an thih phah bakah midang 500 velin hliam an tuar bawk. He thil thleng hi India rama misualin bomb an tihpuah zinga rapthlak ber zinga mi nia ngaih a ni.   

Special public prosecutor, TD Goswami chuan he thubuaiah hian mi 22 chu thubuai siamsak an nih thu sawiin heng zinga 15-te hian trial an hmachhawn thu a sawi. Mi pasarih chu an awmna chin hriat a nih loh thu leh pahnih chu an thi tawh nia a lan thu a sawi.

CBI investigating officer, NS Yadav chuan thiam loh chantir hi mi ṭhenkhat chuan thi tura hrem an ngiat tih a sawi ve bawk. Hetihlai hian Daimary chuan court sang zawkah an thlen leh dawn tih a sawi a ni.

2013 aṭang khan Diamary hi interim bail-a chhuahtir a ni a. mahse January 28 khan bail a dilna chu hnawl sak niin a hnu lawkah man a ni zui leh a ni.