Misual-ten Meghalaya-ah biak-in bei Puithiam nasa takin sawisa

Meghalaya-a West Garo Hills-a biak-in chu Nilaini khan misual-ten beiin Dominic Savio Mission puithiam pahnih chu nasa taka sawisa in thirtiang-ten an vua a ni.

Hei hi tunhnaia Garo Hill-a biak-in beih a thlen vawi lina a ni tawh.

WGH police-te thu­neihna huamchhunga Garobadha Inves­tigation Centre-ah FIR thehluh a ni. FIR hi Garobadha-a Dominic Savio Mission-te thehluh niin mi 20 vel, hmaituam leh Garo ṭawng thiam  mumal lo takte chuan zing dar 1:15 velah biak-in gate pui tichhia in mission building pui ber an pan nghal thu ziah a ni a, Parish puithiam office-ah an lut nghal niin an ziak bawk.

Office an luh hnu chuan misualte chuan drawer-te hawngin cheng nuai 1.25 an lak bakah Rev Fr Thomas John (SBD, Asst Parish Priest) leh Daniel M Sangma (preacher)-te andorid phone chu an laksak bawk. Puithiam pahnihte hi an ka leh an kutah hrensakin thirtiang in na takin an vaw bawk a ni.

Parish puithiam tho, John Mathias M Marak chuan thil thleng chu a hriat velah midang a pun a, misualte chu thawm an hriat hian an tlanbo zui ngal a ni.

Hetiang deuh chiah hian Dawagre (EGH), Chokpot (SGH) leh Dalu (WGH)-ahte pawh thil thleng report a awm tawh a, police-te chuan misual pawl pakhat tih vek a nih an rin thu an sawi.

superintendent of police, WGH, DR MGR Kumar chuan case chu an chhuichhuak ṭep tih sawiin an chhuichhuah vat theih an beisei thu a sawi. Biak-in aṭanga pawisak lak chu an tum  ber nia a lan thu sawiin, pawikhawihna chu pawl pakhat tih nia a lan thu a sawi bawk. 

SP chuan misualte hian load shedding chu hmang ṭangkaiin pawikhawihna hi an thlen ṭhin tih sawiin, MeECL thuneitute hnenah pawh  load shedding hun tikhawtlai tura ngen a nih thu a sawi.

January 21 pawh khan Dalu-a Sacred Heart Church chu beih niin cheng nuai nga rukbo a ni tawh bawk.