PM Modi-a'n thla thum chhunga Nagaland buaina chinfel a duh

Prime minister Narendra Modi-a kaihhruai sorkar laipui chuan Jammu and Kashmir special status pekna, Article 370 a tihtawp hnuah, Nagaland politics buaina chu thla thum chhunga chingfel turin target a siam leh ta. 

Nagaland governor leh Naga peace talk-a palai, RN Ravi chuan Pathianni khan PM Modi hian inremna chu thla thum chhung ngeia ziakfel tura a ngen thu a sawi. "Kum 22 chhung zet inbiakna hi kalpui a nih tawh avangin thla thum hun inpek hi a tepter pawh a ni tawh lo. Thil pawimawhte chu sawifel a ni vek tawh a, Naga mite hnena thuneihna pek dan tur chungchangte nen. Duhthlan turte pawh siam a ni a, palaite chu kawng dap zel tura tih an ni," a ti. 

Ravi hi Nagaland peace talk-ah sorkar laipuiin palai atan a ruat a ni. Deputy national adviser leh Intelligence Bureau hotu hlui a ni a, August 1 khan Nagaland governor atan lakluh a ni. Nagaland helpawl, NSCN(IM) chuan kum 1997 khan sorkar laipui nena inkahhai thuthlung an lo ziak tawh a, kum 2015 August thla khan Modi kaihhruai NDA sorkar nen 'Framework Agreement' an ziak tawh bawk. He inremna ruangam an siamah hian NSCN(IM) chuan Nagaland-a thuneihna insem a, Naga te unique identity pawm an remti a ni.

Mahse NSCN chuan sorkar laipui chuan an thil phut hrang hrangte a tihlawhtling vek lo a nih chuan final agreement siam theih a ni lo ang, an ti. 

Palai hna thawktu, Ravi hian inremna siam a nih theih nan hian stakeholder hrang hrang pawh a hmu tawh a, mahse Naga group-te hian Nagaland tan constitution hran leh flag hran an ngiat avangin inremna hi an la siam thei lo.