Tripura-in helpawl hruaitu hluite security pek a titawp

Tripura sorkar chuan helpawl hruaitu hluite  hnena security a pek ṭhin chu a titawp.

BJP kaihhruai ṭang­rual sorkar hian tunhnaiah political party hruaitu eng emaw zat hnena vengtu, per­sonal guard a pek ṭhin chu a lo titawp tawh bawk a ni. 

State sorkar official-te chuan thil awmdan hrang hrangte ngaihtuah a nih hnuah he thutlukna hi siam a nih thu an sawi a, an nunna dinhmun derthawnga ding ni lo te venhimna pek zel chuan sorkar sum tam tak a pawt hek a ni, an ti. 

Security an tihtawp sak te hi Tripura National Volunteers (TNV), Tripura Resurrection Army (TRA), All Tripura Tiger Force (ATTF), All Tripura Tri­bal Force (ATTF) leh National Liberation Front of Tripura (NLFT) hruaitu hluite an ni.

Heng pawlte hi sorkar kutah an inpe vek tawh a ni. Hetihlai hian  Tripura United Indigenous Peo­ples Council (TUIPC) chuan Pathianni khan helpawl hruaitu hluite security tihtawpsak an ni chu an lawm loh thu an sawi. Sorkar hnenah a thutlukna hi ennawn tura ngenin, helpawl hruaitu hluite chu an dinhmun a la him tawk lo niin an sawi.