Hmarchhak tana 'fund' dah 258%-in tipung: Amit Shah

Union home minister Amit Shah chuan Thawhṭanni khan  13th leh 14th Finance Commission inkarah khan hmarchhak tana 'fund' dah chu 258% zetin tihpun a ni tih a sawi.

Home Minister chuan hmarchhak tana sum dah zat chu Rs vbc 87,000 aṭangin Rs vbc 3,13,375-ah a pung tih a sawi a ni. Thawhṭanni khan Dimasa Bhawan, Dwarka, New Delhi-a Karbi Bhawan lungphum phumnaa thu a sawiah, Amit Shah chuan hmarchhak state-te chu kum tam tak chhung hmasawnna kawngah an hnufum hle a ni, a ti. Mahse prime minister Narendra Modi kaihhruai sorkar hnuaiah hmasawnna chhinchhiah tlak tam tak an hmu tawh tih a sawi.

Hmarchhak chu tunah chuan kawng­pui, thlawhtheihna leh rel hmangin ṭha taka kalpawh theih a ni tawh a, hmar­chhaka hmasawnna chuan helna titlemin, remna leh muanna a thlen a ni, a ti. Hmarchhak hmasawnna chu sorkarin a ngaipawimawh hle tih leh an culture hausa tak chhawmnung chunga hmasawnna thlen chu an tum a nih thu a sawi bawk. 

PM pawhin hmarchhak mite hma­sawnna atan a hun tam thei ang ber a pe a, central minister-te pawhin ni 15 danah hmarchhak state-te chu an tlawh reng a ni, a ti. Hmarchhak scheme ṭhenkhat sawilang bawkin Skill Development Centre hawn te, medical college din leh law college thar din a nih thute a sawi. DoNER ministry chuan Assam-ah Bamboo Industrial Park dinna turin hna an thawk ṭan tih a sawi bawk a ni.