JNIMS doctor-ten nawrh huaihawt
Imphal, Manipur-a Jawaharlal Nehru Institute of Medical Sciences (JNIMS) hospital doctor-te chuan damlo pakhat a thih chungchanga senior doctor suspend a nih avanga lungawi loin, Thawhṭanni khan nawrh an huaihawt.
JNIMS hospital-ah hian July 8 hian nau nei tur admit niin, July 10-ah naute a nei a, August 14 khan a nu hi a thi a ni.
State Health and Family Welfare department thupek angin, senior doctor (obstetrics and gynaecology) Dr Tensubam Nimmi kaihhruai doctor team-in damlo an enkawl dan hi chhui chian tir a ni. Damlo thi ta chhungte leh an khaw mite nawrna avangin Dr Nimmi hi suspend a ni.
Senior doctor suspend a ni hi lungawi loin, a thawhpui doctor rualte chuan lungawi lohna an lantir a, suspend a nihna hi sut a nih loh chuan nawrhna lian tham huaihawt an tum tih an sawi. Doctor-te chuan department lamin chhui chianna tak tak nei loin doctor suspend-na thupek hi an tichhuak tih an sawi a, hetiang thil thleng hian sorkar hospital hrang hranga doctor-te hnathawh danah nghawng ṭha lo a thlen thei a ni, an ti.
JNIMS-a Teachers Association thupuangtu, Dr N Kumarjit chuan Dr Nimmi suspend a nih danah hian thil fel tawk lo a tam hle tih sawiin, a dem thu a sawi. Damdawi-ina damlo thi an awm apiangin doctor-te chuan an tuar dawn em ni tia zawtin, hetiang boruakah chuan damlo enkawl pawh an ngam lo mai dawn tih a sawi.