March thlaah Amit Shah-a'n Meghalaya tlawh dawn

Union home minister Amit Shah chuan March thlaah Meghalaya state tlawh a tum.

Chief minister Conrad Sangma chuan an state-a Amit Shah zin tur thu hi sawiin, Home Minister hian hmarchhak bial planning body, North Eastern Council (NEC) thuam chak dan turte a ngaihtuahpui dawn tih a sawi. Amit Shah hi NEC ex-officio chairperson a ni. Hemi rual hian political leader leh organisation  hruaitute pawh a kawm nghal bawk ang. 

CM-in Amit Shah zin tur thu a puan hnu hian Meghalaya-a pressure group hrang hrangte chuan hun rei tak an lo phut tawh, an state-a Inner Line Permit (ILP) system hman an phut chungchang sorkar laipuiin a ngaih pawimawh sak tawk lo nia sawiin, Amit Shah chu an sawisel nghal a ni.

Khasi Students' Union (KSU) president Lambokstar Marngar chuan Union Home Minister hian a hmain ILP chungchang sawipuiin Delhi-ah a koh thu thu a sawi a, tunah a thu chu thlakin Shillong-ah zin a tum tih a sawi leh a, hei hi ILP hmanna tur tihkhawtlai a tumna mai mai niin a sawi. Sorkar laipuiin kum khat chuang liamtaa Manipur tana ILP hman phalna a pek hnuah, tun thlenga Meghalaya dilna a la tihkhawtlai sak zel chu pawm theih a ni lo tiin a sawi bawk.