Tripura HC-in nawrh huaihawt phal loh chhan Sawifiah turin state sorkar a hriattir

Tripura High Court chuan state sorkar hnenah, zirtirtu aṭanga ban takten nawrh huaihawt chhunzawm an dilna a phalsak loh chungchang sawifiah turin a hriattir. 

State sorkar chu March 1 hma ngeia insawifiah turin High Court chuan a ti. Tripura-a zirtirtu aṭanga bante hian an hna ngaia dah let leh phutin nikum December 7 aṭang khan tiam chin awm loin nawrh an huaihawt a ni.

Mahse January 27 khan Agartala-a nawrh huaihawtte inkhuarna hmun chu police-ten kal chilhin an hnawtdarh a, an puan in kaihte pawh an tihchhiat sak bawk. Police leh nawrh huaihawtte hi an innawr buai zui a, mi 87 in hliam an tawrh phah nghe nghe. Hliam tuar zinga 70 hi nawrh huaihawtte zinga mi niin, police 17 an hliam tel bawk. 

Police-ten an awmna hmun aṭanga an nawr chhuah hnuah, zirtirtute hian February 3 aṭang khan nawrh huaihawt chhunzawm leh an tum a, mahse thuneitu lamin phalna an pe duh lo a ni. Hei vang hian zirtirtute hi High Court lamah zualkoin, petition an thehlut ta a ni.