Ramri buaina chingfel thei lohah Assam sorkar puh

Assam-a regional party Assam Jatiya Parishad (AJP) chuan chief minister Sarbananda Sonowal kaihhruai BJP sorkar chu state ṭhenawmte nena ramri chungchanga buaina an neihte chingfel thei lohah a puh. 

AJP chuan ramri hrula cheng, an state mi leh sate venhimna kawngah sorkar lai chuan hma a la ṭha tawk lo niin an tarlang. 

Mizoram nena ramri chungchanga buaina an neih thar bakah, ṭhenawm state dang Meghalaya, Arunachal Pradesh leh Nagaland pawhin Assam ram chin an rawn luahsak nia sawiin, AJP general secretary Jagadish Bhuyan chuan BJP kaihhruai sorkar chuan heng buainate hi kum nga chhungin a chingfel thei lo a ni, a ti. 

Ramri chungchang buaina kaihhnawih, Supreme Court-ah petition eng emaw zat thehluh chu tihkhawtlai a la ni a, hemi chungchangah hian Assam-a BJP sorkar chuan state mipuite hma ngai zawngin eng kawng mahin hma a la lo tiin AJP chuan an tarlang.