Manipur media house grenade hmangin bei

Manipur khawpui, Imphal-a local newspaper office chu kar liam ta Inrinni zan khan mi tu tih hriatlohin  grenade hmangin a bei a, hei vang hian lungawi lohna lantir nan nimin khan Manipur-ah tualchhung chanchinbu tihchhuah a ni lo. 

Imphal-a Keis­hampat-a Pok­napham daily office-ah Inrinni zan dar 6.30 vel khan mi tu tih hriat lohin grenade a vawm lut a, mahse van­neihthlak takin a puak lo hlauh a ni. Grenade vawm luttu hian helmet khumi, face mask a vuah bawk a, a grenade hman hi China siam a ni. Grenade hi office main door bul corridor-ah a vawm lut a, amah hi a tlanchhe zui nghal nia sawi a ni. 

He thil thleng hi police-te hriattir nghal niin, police team an kal nghal a, grenade pawh hi an laksawn nghal a ni. All Manipur Working Journa­lists’ Union (AMWJU) leh Editors’ Guild Manipur (EGM) chuan media house beih a nih avang hian Inrinni zan khan emergency meeting an nei nghal a, lungawi lohna lantirna atan Pathiannia tualchhung chanchinbu tihchhuah loh an rel nghal.

Media house beitu hi hriat a ni lo a, police-te chuan zawnchhuah ngei tumin ngawrh takin an chhuizui mek a ni.