Manipur Govt College teacher-ten class boycott dawn

Manipur-a Govern­ment College teacher-te chuan an thil phut chungchang sorkarin a ngaihsak loh avangin February 17 aṭangin class an boycott dawn tih an sawi. 

Federation of Govern­ment College Teachers’ Association (FEGOCTA) hming hian January 28 aṭang khan collge zirtirtute hian 7th UGC Pay and Regulations, 2018 hman phutna an lo nuar tawh a ni. Ni 12 chhung an college campus-ah ṭheuh sit-in protest an  huaihawt a, kar liam ta Zirtawpni leh Inrinni khan a rualin casual leave an la bawk. A huhoa leave an lak hnuah pawh state sorkar aṭanga chhanna engmah an dawn loh avangin February 17 aṭangin an thil phut nawrna atan zirtirtute hian class lak loh an tum ta a ni. 

Zirtirtute chuan state cabinet-in UGC policy hi a pawmpui hnuah, sorkar chuan a la kalpui duh lo niin an sawi. Chief Minister-in sorkarin inremna kawng zawnga inbiakna neihpui a duh thu sawi tawh mah se, FEGOCTA hian sorkar aṭanga sawmna engmah an dawn loh thu an sawi bawk. 

FEGOCTA chuan 7th UGC Pay and Regulations, 2018 hi kum thum liam ta aṭanga hman tawh tur a nih laiin tun thlengin an state-ah hman a la ni ve lo tih a sawi. An pawl chuan kum 2018, December thla aṭang khan hmang turin sorkar an nawr tawh niin an tarlang.