AP-in India tana Tawang latu Major Khathing chawimawi

Arunachal Pradesh sorkar chuan kum 70 liam taa India tana Tawang latu, Major Ralengao Khathing hriatrengna hmun, Tawang-a siam tur chu lungphum phum a ni. 

Governor Brig (Retd.) BD Mishra chuan kum 1951-a Major Khathing-a'n Tawang-a India hnam puanzar a lo zarna hmun nia sawiah nimin khan a puala hriatrengna tur hmun siamna tur lungphum hi a phum a ni. He hun hi chief minister Pema Khandu, Meghalaya chief minister Conrad Sangma, Union minister of state for sports and youth affairs Kiren Rijiju, Chief of Defence Staff General Bipin Rawat leh Khathing chhungten an hmanpui. 

Bob tia hriat lar zawk, Khathing hi India ram leh Arunachal Pradesh-ah ngei pawh hriat lar lutuk a ni lo a, mahse Tawang-ah chuan China ral lian tur laka Tawang bial humhim a, India thuneihna hnuaia dahtu a nih avangin an ngaihluin an la zah hle. A hriatrengna hmun tur siam a nih tur thu CM-in thla hmasaa a puan ṭum pawh khan, mi tam takin Arunachal Pradesh tana Khathing hlutna hi la hrechiang lo mah se, hriatrengna hmun siam a, a chanchin leh a hnathawhte pholan a nih hunah an la hrechiang dawn a ni, tiin a lo sawi tawh a ni.