Bangladesh-ah Hmarchhak helten camp an nei lo: Bangladesh

Bangladesh thuneitute chuan Thawhlehni khan an ram chhungah hmarchhak helten camp an nei lo tih sawiin, camp an siam nia puhna chu an pha.

Shillong-a Indo-Banga Deputy Commissioner meet neia kal Bangladesh member 52-te kaihruaitu, Bangladesh-a Jamalpur district, district magistrate Ahmad Kabir chuan Thawhlehni khan India thuneituten an ramah hmarchhak helten camp an nei nia an sawi chungchang chu rawn sawichhuakin, a awm loh thu kan lo hrilh a ni, a ti. Ram pahnihten ramri kana firfiaka chetna awm ṭhin chungchanga thu an inhrilh tawn dante sawi bawkin, Bangladesh sorkar chuan engtiklai mahin helna emaw, firfiaka chetna emaw a thlawp ngai lo a, a dodal reng zawk a ni, a ti bawk.

Thawhlehnia meeting-ah hian Meghalaya West Jaintia Hills-a lui luang Myntdu lui, Bangladesh china Sari lui tia hriat bawk tihbawlhhlawh chungchang pawh an sawiho bawk. He lui hi ram pahnih hian an inṭawm thu leh tihbawlhhlawh a nih lohna turin hma lak chhunzawm zel a ngaih thu a sawi a ni.

India aṭanga Bangladesh-a bawng tawlhruk ṭhin chu tihtawp an duh tih sawiin, BSF leh BGP pawh hemi chungchangah hian an thawkdun zel dawn tih a sawi.