NRC-a tel lote 'appeal' leh theih hun pawtsei

Union Home Ministry chuan Thawhlehni khan thuchhuah siamin, Assam-a kalpui mek National Register of Citizens (NRC) list-a tel lote insawifiahna hun siamsa, ni 60 chhung hun pek chu ni 120-ah a pawhsei sak.

Home minister Amit Shah hoin Thawhlehni khan NRC chungchang hi an ngaihtuah a, hemi hnu hian thuchhuah hi an siam ta a ni. He meeting-ah hian Assam chief minister Sarbananda Sonowal, union home secretary Rajiv Gauba, Assam Chief Secretary leh senior officer eng emaw zat an tel.

NRC list-a tel lote hian Foreign Tribunals (FT) hnenah an 'appeal' leh thei dawn a, hemi atana ruahmanna awm sa ni 60 chhung hun pek chu ni 120-ah tihpun a ni. NRC list hi July 31-a puangchhuah tura tih kha ni mah se Supreme Court chuan sorkar ngenna angin thla khat dang hun a pekbelh leh a, tun thla ni 31 hian puanchhuah a ni ang.

Thawhlehnia review meeting an neihah hian NRC-a tel lote dan anga an chunga hmalakna tur leh hmalakpui ngaite chu Assam sorkar kutah dah a ni nghal bawk.