Kohima airport siam turah DoNER-in 'fund' ṭhenkhat tumsak dawn

Development of North Eastern Region (DoNER) Ministry chuan Nagaland khawpui Kohima-a green­field airport siam tura ruahmanna awm meka 'fund' ṭhenkhat chu an tum ve dawn. Kohima-a greenfield airport tur atan hian cheng vaibelchhe 6,000 ruahman a ni.

Union DoNER mi­nister Jitendra Singh chuan hemi chungchang hi Nagaland chief minister Neiphiu Rio hnenah Nilaini khan a sawi. Jitendra Singh chuan Ko­hima-a airport siam chu DoNER chuan an ngaipawimawh hle tih a sawi a ni. State sorkarin a hmun tur a tihfel hun atan Airports Autho­rity of India pawhin eng boruak hnuaiah pawh kalpui theihna turin 'technical feasibility report' an buatsaih a ni tih a sawi bawk.

CM chuan airport siamna atan chuan cheng vbc 6,000 vel ruahman a ni tih leh a ṭhen azar chu DoNER ministry emaw  North Eastern Council (NEC) emawin tumsak turin a ngen a, DoNER minister chuan cheng vbc 1,000 vel chu a kaihhruai ministry chuan an 'sanction' sak thei dawn niin a sawi a ni.

An ruahmanna a hlawhtling a nih chuan airport hi Chiethu, Kohima-a siam tur a ni ang. DoNER Minister chuan prime minister Narendra Modi pawhin hmarchhak state pariatte hmasawnna chu a ngaipawimawh hle tih a sawi.