Sorkar laipuiin Imphal-Mandalay air service tir remti

Union Civil Aviation Ministry chuan Imphal, Manipur leh Mandalay, Myanmar inkara thlawh­theihna service tir chu a remti tih Manipur chief minister N Biren Singh chuan a sawi. 

Nilaini-a Manipur Helicopter Ser­vice kalpuina tur, Imphal International Airport-a a hawnnaah CM chuan he thu hi a sawi a ni. Myanmar-a private airline, Air KBZ chuan Imphal leh Mandalay inkara international flight service tir a duh thu hi a lo sawi tawh a, Imphal-a KB Enterprise nen June thla khan MoU pawh an lo ziak tawh a ni. 

CM Biren Singh chuan Imphal - Delhi via Aizawl, Agartala leh Silchar tan service ṭha zawk an duh tih a sawi a, lehlanga Delhi kal theihna tur an duh thu a sawi. Hei bakah hian Imphal-Silchar flight service pawh kalpui leh thuai a ni dawn, a ti.

Imphal-Dibrugarh flight service pawh siam a ni thuai dawn tih sawiin, CM chuan Imphal International Air­port runway thar siamna atan cheng vaibelchhe 600 ruahman a nih thu a sawi. Manipur-ah hian state chhunga helicopter service chu hun eng emaw chen tihtawp a nih hnuin Nilaini aṭang khan kalpui  leh ṭan a ni.