IPFT-in Tipraland state hrang ngiatin kawng zawh

Indigenous People’s Front of Tripura (IPFT) chuan nimin khan Tripura Tribal Areas Autonomous District Council (TTAADC) head­quarters, West Tripura district-ah Tipra­land state hran ngiatin kawng an zawh. 

IPFT hian kum 2009 aṭang khan TTAADC chu tichangtlung a, state hrana siam an lo phut tawh a ni. TTAADC hian Tripura state zau zawng hmun thuma ṭhena hmun khat a huam a, mihring 12,16,000 an cheng a ni. 

Mangal Debbarma, IPFT thupuangtu leh General Secretary chuan sorkar laipuiin Jammu and Kashmir ṭhen darh a, union territory pahniha a ṭhen chuan state hran pek phuttu dangte pawh na zawka kal turin a nawr a ni, a ti. 

Debbarma chuan prime minister Narendra Modi pawhin IPFT palaiten meeting neihpui an ngenna chu a remtihpui tawh tih a sawi bawk. 

Vawiin hian Indigenous Nationalist Party of Tripura (INPT) chuan TTAADC headquarters-ah Tripura-a National Register of Citizens (NRC) kalpui phutin kawng an zawh dawn bawk a ni. INPT General Secretary Jagadhish Debbarma chuan kum 2018, October thla khan Supreme Court-ah NRC kalpui ve tura ngenna an lo thehlut tawh tih sawiin, court pawhin sorkar laipui leh state sorkar pawh hriattirna a pe tawh a, mahse hetichung hian tun thlengin kalpui a la ni ve lo a ni, a ti.