Manipur sorkarin State film policy a pawm

Manipur sorkar chuan an state-a film industry tihchangtlunna turin Manipur State Cinema policy, 2019 a pawm.

Chief minister N Biren Singh kaihhruaia cabi­net meeting chuan cine­ma policy hi a pawm a ni. State film industry hnuaia pawl lian ber, Film Forum Manipur (FFM) chuan state cabi­net thutlukna siam hi lawmawm an tih thu a sawi. FFM hi Federation of Film Societies of India (FFSI)  hnuaia awm a ni. 

FFM chairman S Man­goljao Singh chuan chief minister-in Manipur film industry chawikanna tura a hmalakna chu lawmawm an tih thu a sawi a, hemi rual hian a thil phut dangte pawh tihlawhtling turin a ngen nghal bawk.

Singh chuan kum 2017 aṭang khan CM hnenah ngenna pathum an thehlut tawh tih sawiin, tunah sorkarin cinema policy a pawm tak avangin an thil ngente pawh ngaihtuah sak an nih ngei a beisei thu a sawi. Cinema hall ṭha zawkte pawh an neih chhoh theih an beisei tih a sawi a ni. 

Imphal-ah hian cinema hall 10 vel awm ṭhin mah se, tunah hian cinema hall pakhat chauh a awm tawh a ni. Cinema hall tam tak khar vang hian sorkar pawhin sum tam tak a hloh phah bawk. FFSI tarlan danin, Manipur-ah hian kum tinin film 60-70 vel siam a ni a, music album pawh 100 chuang tihchhuah ṭhin a ni. Manipuri film hian kum 47 chhungin National Film award 36 an la tawh bawk a ni.