Assam-in 90:10 funding pattern hman leh phut

Assam sorkar chuan sorkar laipui hnenah an state-a MSME sector hnuaia industry lam tihlenna turin tuna funding pattern hman mek, 80:20 aiah a hmaa lo hman ṭhin, 90:10 chu hmang leh zawk turin a ngen. 

State industries and commerce mi­nister Chandra Mohan Patowary chuan Ningani khan Union MSME minister Pratap Chandra Sarangi hnenah ngenna hi a thlen a ni. Minister Patowary chuan Micro, Small and Medium Enterprises (MSME) chu Assam-a industry lam hmel lanna sector pawimawh tak a ni tih a sawi. He sector kaltlang hian mi tam tak hnathawh tur siamsak an nih thu leh, state economy ṭhanna kawnga pawimawh tak a nih thu a sawi. 

Special category state an nih angin, sorkar laipui leh state sorkarin fund an tum dan, 80:20-a siam chu a hmaa lo hman ṭhin, 90:10 anga kalpui leh turin a ngen. Hei bakah hian MSME sector-a infrastructure puala sum pek cheng vaibelchhe 10 chu cheng vaibelchhe 20-ah tipung turin a ngen bawk.

Union minister hnenah hian MSME scheme kaihhnawih tool room, extension centre, PMEGP,  industrial infrastructure tihhmasawnna dan chungchangte pawh a sawipui a ni. Minister Sarangi pawhin a theih anga puih lo tiamin, MSME hnuaia state project siamna tur sanction dan pawh lo ngaihtuahpui a tiam bawk a ni.