NPF aiawhte'n Governor hmu Naga politics buaina chinfel thuai duh

Nagaland-a eptu party Naga Peo­ple’s Front (NPF) chuan Nilaini khan Nagaland governor thar R N Ravi chu hmuin Naga politics buaina chinfel thuai an duh thu an thlen.

NPF hian Governor thar hi lawmpuina thu hrilhin, rei tak chinfel loha awm tawh Naga politics buaina chu chinfel thuai a nih an beisei thu an hrilh. Mi zawng zawng tana pawmawm leh rintlak inremna siam an duh thu an thlen a ni.  

NPF aiawhte hi  secretary general, K G Kenye chuan a kaihruai a, Naga politics buaina chinfelna tura palai ni bawk Ravi chu buaina chingfel tura an rintawk thu a sawi.

Governor hnenah hian 1964-a inkahhai puan a nih hmasak ber ṭum khan, NPF party legislator-te chuan inremna a awm theihna turin Assembly member an nihna an bansan hial tih an sawi bawk. 1997-a NSCN(IM) leh India sorkarin inkahhai puang tura inremna an siam leh pawh khan NPF party chuan Naga Civil Society zawng zawng chu kokhawmin, 1998 inthlan pawh kha an boycott a ni. Hei hi sorkar laipuiin Naga mipuite duhdan hria se an duh vang tih an sawi. 

Hemi a nih avang hian Naga Peo­ple’s Front chuan Governor hnenah hian Naga politics buaina chinfelna chu ngaipawimawh hmasa ber turin an ngen a ni. An party chuan remna a awm theihna tur chuan an thawhpui zel dawn tih an sawi bawk.