Tuman BJP zawm turin Congress an chhuahsan dawn lo: Mukul

Meghalaya-a Congress Legislature Party (CLP) leader leh chief minister hlui ni bawk Dr Mukul Sangma chuan Congress MLA ṭhenkhatin BJP an zawm dawn nia thuthang awm chu thu dik lo a nih thu leh, BJP zawm turin tumahin Congress  an chhuahsan dawn loh thu a sawi.

Zirtawpni liam ta khan tunhnaia Congress party chungchang thuthang lengvel kaihhnawiha thuthar theh­darhtute zawhna a chhang a ni. Congress MLA-ten BJP an zawm dawn nia sawi chu thu dik lo a ni, tia sawiin, amah ngei pawhin BJP a zawm nia thuthang awmte chu a dik lo tih a sawi. 

State-a sorkarna siam mek Megha­laya Democratic Alliance (MDA) member ṭhenkhat chuan tunhnai khan Congress MLA ṭhenkhatin an party an chhuahsan dawn tih an sawi a, chung zingah chuan senior legislator Ampareen Lyngdoh pawh a tel niin an tarlang a nih kha.

Dr Mukul Sangma chuan hemi chungchanga zawhna hi chhangin CLP chu an inpumkhat ṭha hle tih leh Amareen ngei pawh ni tlemte liam ta lawka CLP meeting-ah a tel tih a sawi. Guwahati-a hmunpui nei news website chungchanga Meghalaya police-te hmalakna chungchang zawhna chu chhangin Sangma chuan police-te hmalak dan chu a ngaihtuah zui em em loh thuin a chhang a ni.