NSCN-IM-ten Flag leh constitution hran phut

Naga hel pawl Nationalist Socialist Council of Nagaland- Isak Muivah (NSCN-IM)-te chuan prime minister Narendra Modi hnenah thu thlenin, Naga politics buaina chu flag leh constitution hran pek an nih chauh loh chuan chinfel a nih theih dawn loh thu an sawi.

Sorkar laipui nena 1997 aṭang tawha inremna zawnga inbiakna nei tawh, NSCN-IM chuan kum thum liam taa sorkar laipui nena inremna an ziah Framework Agreement chu a hmawr bawk a ni ṭep tawh tih an sawi bawk. NSCN-IM chuan thuchhuah siamin,"Kum thum chhung chu hun rei tak ni mah se Framework Agreement chu a hmawr an bawk ṭep a, sorkar laipui chu an dinna laimuah an chian har avangin an che muang hle a ni.

Thil inthlak vang leh thil thleng eng eng emaw avangin Naga mipuiten buaina leh hriatthiam loh thil an ngah a, inremna zahawm tak a awm theih leh theih loh chungchangah rinhlelh an neih avangin NSCN Chairman Q. Tuccu leh General Secretary Th. Muivah-te chuan prime minister Narendra Modi hnenah lehkha an thawn a ngaih phah a ni," tiin an tarlang.

"Issue pawimawh tak pahnih, Naga flag leh constitution chungchang chu pawl pawhnihten an pawm a ngai a ni. Heng thil pahnih tel lo hi chuan eng inremna pawh awm se inremna zahawm tak a ni thei lo ang," tiin an tarlang bawk.